اورمو دان عرفانا یئتیشدیم

اورمو دیاریندان من دوشدوم یولا

گزه - گزه بو مکانه یئتیشدیم

فیض آلدیم اوستاددان آلدیم پاییمی

گوهر آختاریردیم کانه یئتیشدیم

اویاندیم غفلت دن واردیم عرفانا

آلدیم مطلبیمی اولدوم مستانا

صدقیله سیغیندیم قادر سبحانا

هدهد اولدوم سلیمانه یئتیشدیم

صدف اولدوم دریالاری دولاندیم

ایوب کیمی هر بیر درده دایاندیم

موسا کیمی طور داغینا ایناندیم

ادب آلدیم یول ارکانه یئتیشدیم

حقیقتدن بیر یول دوشدو الیمه

معرفتدن سو باغلاندی گولومه

مصطفا یام یالان گلمز دیلیمه

قطره ایدیم بیر عمانه یئتیشدیم

"دول لو مصطفا"