صادق بشیرلی کرکوکلو
یاپیشسین جسمیمه دردین، سریلسین کؤکسومه آهین
غمین بو باشه گلسین هم قادان بو جانه ای کرکوک!
گوزهلدیر توپراغین دونیاده لؤلؤدهن جواهردهن
داشین بنزهر دهنیزلردهن چیقان مرجانه ای کرکوک!
ولاکین دیشده بارماق، چوق یورکده اودلو حسرت وار
کی، دؤنموش توپراغین بیر قورخولو زندانه ای کرکوک!
سوسوز قالمیش «چاییندان» آغلادی «صادق»(۱) گئچن گونلر
«خاصان»(۲) آقدی بو گونلر آما دؤنموش قانه ای کرکوک!
یورهکلر دوغروسو «گورگور بابا»ن(۳) تک اودلودور اودلو
اودوندان قالمیشیق باللهی یانه ـ یانه ای کرکوک!
آچیق ـ آشکاری بو دولموش کی، آلتین «قاره آلتیندان»(۴)
ندهن قالمیشسان آما هر زامان ویرانه ای کرکوک!
او گون «صادق» زامانی دوشدو اهلین هر چتین درده
بو گون بیزلر چالیندیق گؤر نه یاندان ـ یانه ای کرکوک!
قارا نفتیله غربین ائولری گون تک ایشیقلاندی
دومانی آما دؤندهردی سنی کولخانه ای کرکوک!
کناریندان اسن یئللر دئشیر یارهم، سؤکور دردیم
نولور بین دفعهده دردیم دئسهم لقمانه ای کرکوک!
یوزون چوق موم(۵) گیبی پارلاتما انصاف ائت مروت قیل
کی وار بوردا قاناتی چوق قیریق پروانه ای کرکوک!
مگر لیلاسن ای جانلار عزیزی! سن بو دؤوراندا؟
منی مجنون تک ائتمیش فرقتین دیوانه ای کرکوک!
اینان سنسیز می ایچسمده دؤنر آغزیمدا می زهره
اولور غمخانه تک سنسیز منه میخانه ای کرکوک!
بو آقشاملار گیبی سنده بیلهیدین باشداکی حالیم
گؤرهیدین بیر نئجه دردیم گلیر طوفانه ای کرکوک!
آغیرتدیم باشلاری شعریله، شعریم دولدو اسمیندهن
قولاق وئر «قم»دان افلاکه چیقان افغانه ای کرکوک!
توکنسهیدی بو غربت ییللری عؤمرومده، دؤنسهیدیم
باساردیم داشینی ـ توپراغینی بو جانه ای کرکوک!
---------------------------
(۱). رحمتلیک «محمد صادق»: کرکوگون انشهرتلی اؤنده گلن و «فارسجا. عربجه و تورکجه» دیللرینده بدیعی اثرلر یاراتمیش اولان شاعر. ۱۹۶۷ م ییلنده وفات ائتمیشدیر.
(۲). خاصا: کرکوک شهرینین اورتاسیندان کئچن بیر چای آدیدیر.
(۳). گرگر بابا: کرکوکده همیشه شعله ساچان بیر نفت یا خود گاز قویوسونون آدیدیر.
(۴). آلتین: قیزیل.// قارهآلتین: نفت.
(۵). شام، شمع
مأخذ: صادق بشیرلی کرکوکلو. شعر مجموعهسی: یوواسیز قوش. مقدمه: ائلشن اوریادلی. ایران: قم: دارالاعتصام؛ للطباعه و النشر. بیرینجی چاپ. چاپخانه مهر. ۱۹۹۷. میلادی.
بو شعری شاعیر قومدا سورگون اولارکن، کرکوکون فرقتینده و حسرتینده سؤیلهمیشدیر. آنجاق آمئریکانین یوروشونده صدامین بعث رژیمی داغیلاندان سونرا عزیز شاعیر صادق بشیرلر جنابلاریدا عراقا کوچدو و اؤز دغما یوواسی و آنا یوردو کرکوکه یئتدی و حسرت گونلری اوتدو. عزیز بشیرلییه عراق تورکلریله بئله موتلو و قوتلو یاشاییش دیلهییریک